السبت، سبتمبر 19، 2015

مردوں کی معلمہ: اماں عائشہ رضی اللہ عنھا



                 تحریر: علی الطنطاوی                                            اردو قالب:سیف الرحمن حفظ الرحمن تیمی

یہ گفتگو ایک ایسی خاتون کے بارے میں ہے جس نے 14صدی پہلے دنیا کے سامنے یہ ثابت کردیا کہ عورت بھی مردوں سے بڑی عالمہ ہو سکتی ہے کہ وہ اس کے پاس زانوئے تلمذ تہ کریں،وہ مردوں پر فائق ہو سکتی ہے کہ لوگ اس کے نقش پا کی پیروی کریں، وہ سیاست میں ہنر آزمائی کر سکتی ہے ، جنگ میں اپنے جوہر دکھلا سکتی ہے، اور تاریخ کے صفحات پر اپنے کارناموں کی ایسی گونج چھوڑ سکتی ہے کہ جس کی بازگشت صدیوں زمانہ سنتا  رہے۔
یہ خاتون نہ تو کسی یونیورسٹی سے سند یافتہ ہے اورنہ اس کے زمانے میں یونیورسٹیوں کا وجود ہی  تھا، لیکن تب سے اب تک یونیورسٹیو ں کے شعبئہ آداب وثقافت میں اس کے آثار و مقولات پڑھائے جاتے ہیں اور اس کے ادبی شہ پارے شامل نصاب رکھے جاتے ہیں، دینیات کے شعبہ میں اس کے فتاوی اور اس سے مروی احادیث کی ورق گردانی کرائی جاتی ہے، نیز اسلامی اور عربی تاریخ کا ہر مدرس اس کے کارناموں کی جستجو کرتا اور انہیں قلب وذہن کے قرطاس  پہ نقش کر کے یک گونہ خوشی محسوس کرتا ہے۔
یہ ایک ایسی خاتون کی داستان ہے کہ ایک زمانہ گزرنے کے بعد بھی دنیا ان کے علم وفن سے مستفید ہورہی ہے، اور لوگ ان کے علم کی وسعت اور فکری آفاقیت سے حیران ہیں۔اس کی وجہ یہ ہے کہ ان کو  ایسا ملکہ نصیب ہوا تھا کہ اس میں کوئی ان کا ہمسر نہیں،بچپنے میں جنہوں نے ان کی پرورش وپرداخت کی وہ مسلمانوں میں سب سے افضل ہیں، وہ ان کے والد حضرت ابو بکر صدیق ۔رضی اللہ عنہ۔ ہیں،جوانی میں جنہوں نے ان کی نگہداشت کی وہ ان کے شوہر نامدار ، اللہ کے رسول،خاتم الانبیاء اور اکرم البشر ہیں،چنانچہ علم  وفضل اور بلاغت وزبان دانی کا جو حصہ انہیں علم و معرفت کے ان چشموں سے میسر ہوا وہ  کسی  اور خاتون عالم کو نصیب نہ ہو سکا۔ 
یہ ایک ایسی خاتون ہے کہ جن کے اندر نسوانیت تمام تر اوصاف کے ساتھ موجود تھی، جو اپنے شوہر کے لئے انس ومحبت کا پیکر تھی،جو رشتے داروں کے لئے باعث فرحت تھی،جو علم ومعرفت میں اس قدر بلند مقام پر فائز تھیں کہ علماء ان سے سیکھتے تھے اور مفتیوں کو وہ فتوے دیا کرتی تھیں،زبان دانی اور بلاغت کا یہ عالم کہ بڑے بڑے خطیب زیر ہوتے  تھے اور الفاظ وجمل ان کی زبان کا لمس پاکر فخر کرتے تھے،شخصیت کی قد آوری دیکھئے کہ ہر میدان میں سر دار ہوا کرتیں ، علم وعمل، سماج ومعاشرہ،سیاست وزعامت اور حرب وضرب ہر جگہ ان کی طوطی  بولتی تھی، رہی بات اسلامی مقام ومرتبہ کی تو وہ عزت واکرام کے بلند ترین مقام پر فائزتھیں،ہاں یہ اور بات ہے کہ اسلام کسی بھی شخص کو تقدس کا وہ مرتبہ نہیں دیتا کہ اسے انسان اور بشر سے مافوق بنا دے، اسے الوہی صفات کا  حامل قرار دیدے، اس کو معصومیت سے متصف کردے اور اسے بلندی کے اس منارے پرچڑھادے کہ اس کی تنقید میں حق گوئی بھی ظلم ٹھہر جائے۔
وہ خدیجہ اور فاطمہ ۔رضی اللہ عنہما۔ کے بعد اسلام کی افضل ترین خاتون ہیں، خدیجہ اس لئے ان سے فائق ہیں کہ ان کی خوبیاں ساری عورتوں سے منفرد ہیں، دانائی میں بڑے سے بڑامفکر بھی انکی برابری نہیں کرسکتا، اصابت رائے  میں ان کی کوئی مثیل نہں،  وہ پہلی خاتون ہیں جنہوں نے اس دین کو سہارا دیا،جبکہ ابھی وہ ناتواں پود کی مانند تھا ، وہ اس دنیا سے رخصت ہوگئیں اور یہ بھی نہ دیکھ سکیں کہ کس طرح یہ پود ایک گھنا، سایہ دار و ثمر دار درخت بن کر اس طرح پوری دنیا میں پھیل گیا اور دنیا اس کے چھاؤں تلے آگئی کہ اس کی شاخیں ہمیشگی اور جاودانی کے حدود بھی عبور کر گئیں۔
انہوں نے محمد کو خلوص، پیار، محبت او روفا دیا، وہ آپ کی سب سے کار گر بیوی تھیں، آپ کے لئے ماں کی طرح تھیں، زندگی کے تیروں سے بچاؤ کے لئے ڈھال کا کام کرتی تھیں۔ رہی فاطمہ ۔رضی اللہ عنہا۔تو جہاں وہ نادر وکمیاب خصلتوں کے سبب دیگر عورتوں سے ممتاز تھیں وہیں انہیں جگر گوشئہ رسول ہونے کا بھی شرف حاصل تھا،وہ آپ کے وجود کا ایک حصہ تھیں،اور تمام خواتین عالم پر برتری کے لئے یہی ایک امتیاز  کافی ہے۔
امام زرکشی نے  الاجابۃ میں اماں  عائشہ رضی اللہ عنہا کی چالیس ایسی خصلت ومنقبت ذکر کی ہے جو کسی اور عورت کے اندر نہیں پائی جاتی،رسول گرامی نے سیاسی مصلحت، ادارتی اور تعلیمی غرض وغایت کے سبب عمر دراز اور ثیبہ عورتوں سے شادی کی،اماں عاشہ ہی واحد خاتون ہیں جن سے آپ نے شادی کی تو وہ کنواری تھیں ،وہ آپ کی سب سے زیادہ چہیتی تھیں، تمام بیویوں پر آپ انہیں ترجیح دیا کرتے تھے،حالت مرگ میں انہی کے پاس قیام کرنا پسند فرمایا،ان کی آغوش مبارک میں آپ کی روح پرواز ہوئی،ان  کے ہی حجرئہ مبارک میں آپ مدفون ہوئے،ان کی موجودگی میں آپ پروحی کا نزول ہوتا تھا، آپ ان کا پاس ولحاظ کیا کرتے   تھے، جب حبشیوں کی ایک جماعت مسجد کے اندر نیزہ بازی کر رہی تھی  تو آپ ان کے لئے کھڑے ہوگئے، انہوں نے آپ کے شانئہ مبارک پر اپنا رخسار رکھا تاکہ حبشیوں کی هنر آزمائى کا نظارہ کریں، آپ ان کو سہارا دئے کھڑے رہے یہاں تک کہ وہ خود ہی ہٹ گئیں،دو مرتبہ آپ نے ان کے ساتھ دوڑ لگایا، پہلی بار وہ آپ پر سبقت لے گئیں، پھر جب اماں عائشہ کا جسم بھاری ہو گیا اور بدن پر گوشت بھر آیا تو آپ ان سے آگے نکل گئے، اور فرمایا: یہ پہلی بار کا بدلا ہے،، ۔ جب حضرت ابو بکر ۔رضی اللہ عنہ۔ان کے پاس آئے، انہیں نبی اکرم سے کوئی ایسی بات کہتے ہوئے سنا جو بیویاں ناراضگی میں کہا کرتی ہیں، تو وہ انہیں مار نے کے لئے بڑھے لیکن حضور پاک نے ان کی حمایت فرمائی اور بچا لیا، اور جب ابوبکر واپس ہو گئے تو اماں عائشہ سے دل لگی کے لئے کہا: دیکھا  میں نے اس آدمی سے تمہیں کیسے بچا لیا؟
آپ اہل خانہ کے ساتھ ایسے ہی پیش آتے تھے،ان کے ساتھ انس ومحبت، خیر وبھلائی، اور فرحت وانبساط کا معاملہ فرماتے تھے، آپ کا برتاؤ ایسا نہیں ہوتا  جیسا کہ لوگ کہتے ہیں کہ مرد ہونے کا مطلب ہے کہ آدمی اپنے گھر میں ترش رو، چیں بجبیں، گال  پھلائے اور منہ بنائے بیٹھا رہے، فوجوں کی طرح بیوی پر حکمرانی کرے، سرکشوں کی طرح اس پر زور چلائے، ہر گز نہیں، نہ تو ہمارے نبی ایسے تھے اور نہ ہی اسلام کا اس سے کوئی دور کا  واسطہ ہے۔بلکہ آپ کی تعلیم تو یہ ہے کہ : تم میں سب سے بہتر وہ ہے جو اپنے  اہل خانہ کے لئے بہتر ہو اور میں اپنے گھر والوں کے لئے سب سے بہتر ہوں،،
حضرت عائشہ ۔رضی اللہ عنھا۔سے آپ کی بے پناہ محبت کی ایک مثال یہ بھی ہے کہ پردہ واجب ہونے سے پہلے ایک فارسی نے آپ کو  ولیمہ کی دعوت دی، آپ نے فرمایا: کیا یہ بھی میر ے ساتھ جا سکتی ہے؟ آپ کی مراد اما ں عائشہ تھیں،انہوں نے نفی میں جواب دیا، دوسری مرتبہ بھی اس نے آپ کی دعوت کی تو آپ نے اس بار بھی یہی شرط رکھی اور وہ اس بار بھی راضی نہ ہوسکا، تیسری بار جب وہ آپ کو دعوت دینے آیا  اور آپ نے کہا : کیا یہ بھی میرے ساتھ جائیگی؟ تو اس بار اس نے ہامی بھر دی اور تیار ہو گیا۔اس واقعے میں جہاں نبی اکرم کی سادہ لوحی، نرم خوئی اور بے پناہ انسیت کا نمونہ ہے وہیں اس داعی کی صاف گوئی بھی صاف جھلک رہی ہے۔اس واقعے کے ان دونوں پہلوئوں کو سامنے رکھئے اور آج لوگوں کی جو صورت حال ہم آپ دیکھ رہے ہیں، ان کا موازنہ کیجئے تو سوائے مایوسی کے کچھ ہاتھ نہیں آتاِ
جب آپ پر وہ آیت نازل ہوئی جس میں آپ کو یہ اختیار دیا گیا کہ آپ جن بیویوں کو رکھنا چاہیں، انہیں رکھیں اور جنہیں طلاق دیکر ان کے میکے واپس کرنا چاہیں ، انہیں کردیں، اس موقع پر بھی اماں عائشہ کے تئیں آپ کی ہمدردی واضح طور پر دیکھی گئی، آپ نے کہا: جلدی میں کوئی فیصلہ نہیں کرنا پہلے اپنے والدین سے مشورہ کرلینا،، آپ کو یہ خدشہ تھا کہ کہیں ایسا نہ ہو کہ عجلت اور جذبات میں اماں  عائشہ دنیا کو ترجیح دینے کی غلطی کر بیٹھیں، انہوں نے جواب دیا: میں اور آپ کے بارے میں کسی سے مشورہ کروں؟ مجھے آپ کے سلسلے میں کسی کے مشورے کی ضرورت نہیں، انہوں نے  حریم نبوت بن کر  خانئہ نبوی کو روشن رکھنے کا فیصلہ لیا اور ان کے بعد تمام ازواج مطہرات نے بھی اسی فیصلہ کو اپنے اپنے حق میں اختیار کیا۔
علم ومعرفت میں اس قدر عالی مرتبہ رکھتی تھیں کہ ابو موسی  اشعری رضی اللہ عنہ کو کہنا پڑا: ہم اصحاب رسول جب بھی کسی پیچیدگی میں پڑتے اور ہمیں کوئی اشکال ہوتا تو ہم حضرت عائشہ سے دریافت کرتے۔
بلاغت اور زبان دانی کا معاملہ بھی علم سے مختلف نہیں تھا، احنف بن قیس کہتے ہیں:میں نے ابو بکر وعمر، عثمان وعلی اور آج تک کے تمام خلفا کی تقریریں سنی،لیکن کسی انسان کی زبان سے اتنی عظیم اور خوبصورت بات نہیں سنی جو عائشہ سے سنی۔
آپ سخی دل اور کھلے ہاتھ کی تھیں،نبی اکرم  کے ساتھ فقرو محتاجگی اور بھوک وفاقہ پر صبر کیا، یہاں تک کہ اسی حالت میں کئی کئی دن گزر جاتے اور گھر میں چولہا نہ روشن ہوتا، پانی اور کھجور پر آپ کا گزر بسر ہوتا،جب مسلمانوں کے اندر فراخی آئی اور دنیا کی نعمتوں نے ان کے ہاں دستک دینا شروع کیا تو ایک مرتبہ اماں عائشہ کے گھر ایک لاکھ درہم کا تحفہ آیا، آپ روزہ سے تھیں، انہوں نے ساری رقم تقسیم کردئے، گھر میں پھوٹی کوڑی بھی نہیں بچی، ان کی لونڈی نے عرض کیا:کیا آپ اپنے لئے ایک درہم کا گوشت بھی نہیں منگوا سکتی تھیں کہ افطار کرسکیں؟ اماں  عائشہ نے جواب دیا:اگر تم نے یاد دلایا ہوتا تو کرلیتی!
  نہ تو غربت سے وہ زچ ہوئیں اور نہ مالداری ان میں کوئی اثر پیدا کر سکی،کیونکہ جب ان کے ذہن ودل میں عظمت نے اپنا بسیرا کر لیا تو دنیا ان کے سامنے ہیچ ہو کر رہ گئی،پھر نہ تو دنیا کی آمد سے آپ پر کوئی اثر ہوتا اور نہ ہی دنیا کے روٹھ جانے سے آپ فکر مند ہوتیں۔
 اماں  عائشہ کی سب سے دلچسپ بات یہ ہے کہ وہ عورتوں کے لئے ایک مکمل آئیڈیل  ہیں، عورت کی فطرت وجبلت، اس کی آرزو وتمنا ، اس کی صفات اور خوبیاں خامیاں ہر معاملے میں وہ ایک انمول مثال کی حیثیت رکھتی ہیں، وہ ایک بہترین بیوی تھیں، اور شادی عورت کی سب سے پہلی حصولیابی ہوتی ہے، عورت کی سب سے بڑی خوشی یہی ہوتی ہے کہ وہ کسی کی بیوی اور کسی کی ماں بنے،چاہے وہ دنیا بھر کے مال ومنال کی مالک ہوجائے، عزت وشرافت میں آسمان کی رفعت کو چھو لے، علم ومعرفت اور زعامت وسرداری میں کوئی اس کی نظیر نہ ہو، یہ سب مل کر بھی اسے شادی اور خانگی زندگی سے بے نیاز نہیں کر سکتے، اور نہ ہی اس کے دل سے اس کی رغبت کم اور میلان ختم کر سکتے ہیں!
آپ ایک خوب رو دوشیزہ تھیں،آپ کو اپنی جوانی اور حسن وجمال کا بھر پور احساس  تھا اور آپ نبی اکرم کی محبت سے خوب محظوظ ہوتی تھیں، بلکہ اپنی سوکنوں پر اس کے ذریعہ  فخر بھی کیا کرتی تھیں، اور حفصہ رضی اللہ عنھا کو اپنا حامی بنا کر زبانی اور عملی ہر دو طریقے سے دیگر امہات المؤمنین پر برتری بھی حاصل کرلیا کرتی تھیں،اگر کسی گھر کے لئے عورت کی ناراضگی  اور نوک جھونک سے خالی رہ  پانا ممکن ہوسکتا تھاتو خانئہ نبوت میں کبھی یہ  واقعات پیش نہ آتے،عورتوں کے لئے جہاں ان واقعات میں نمونے اور مثالیں موجود ہیں وہیں ان کے لئے یہاں سے تسلی کے سامان بھی فراہم ہوتے ہیں، کیونکہ یہ عورت کی طبیعت اور سرشت ہے جو کبھی ختم نہیں ہو سکتی، لیکن مزے کی بات یہ ہے کہ ان سب کے باوجود رضا وخفا ہر حالت میں آپ کی عزت واحترام میں کوئی کسر نہیں کرتیں، حدیث میں آیا ہے کہ آپ نے اما ں عائشہ سے کہا: تم کب خوش اور کب خفا ہوتی ہو، مجھے پتا چل جاتا ہے،، انہوں نے عرض کیا: یہ کیسے؟ آپ نے فرمایا:جب تم خوش ہوتی ہو تو کہتی ہو : محمد کے رب کی قسم، اور جب نالاں  ہوتی ہو تو کہتی ہو: ابراہیم کے رب کی قسم۔
آپ بہت نازنین بھی تھیں ، ناز عورتوں کی فطرت بھی ہے، یہ جمال اور احساس محبت کا پہلا پرتو ہے،  ایک دفعہ آپ نے رسول گرامی سے عرض کیا: آپ کو مجھ سے کیسی محبت ہے؟ آپ نے فرمایا:رسی کی گانٹھ کی طرح۔یعنی اسی طرح مضبوط جس طرح رسی کی گرہ ہوتی ہے۔ اس کے بعد بارہا وہ آپ سے پوچھا کرتی کہ گرہ کا کیا حال ہے؟ اور آپ جواب دیتے: حسب سابق ہے۔
اماں  عائشہ بہت باغیرت بھی تھیں، یہ احساس جمال اور شعور محبت کا دوسرا پرتو ہے،یہ ایسی غیرت ہے جو محبت کو تازگی بخشتی ہے، اسے کم نہیں ہونے دیتی،اس کو ضوفشاں کرتی ہے، اس کی  لو  کو مدھم نہیں ہونے  دیتی،جبکہ بسا اوقات گھوڑے کو چوکس کرنے والا اس زور سے ایڑ لگاتا ہے کہ وہ مر ہی جاتا ہے، اور آگ کو روشن کرنے والا ایسی پھونک مارتا ہے کہ شعلہ خاک ہوجاتا ہے!
آپ ذی علم تھیں کیونکہ علم عورت کی طبیعت کے منافی نہیں ہے،عورت ہونے کا مطلب ہر گز نہیں کہ وہ مردوں کی امامت اور راہبری نہیں کر سکتیں، لیکن جب ان سے  طبعی حد سے تجاوز اور فطرت کی مخالفت سرزد ہوئی اورآپ سیاست کی اس بھٹی میں داخل ہو گئیں جس کا مطالبہ آج کی بعض عورتیں کرتے نہیں تھکتیں،تو پھر میں نہیں بتا سکتا کہ کتنی تباہیاں رونما  ہوئیں، تم خود بصرہ کی سرزمین سے پوچھ لو کہ اس کی آغوش میں کتنی لاشیں سو رہی ہیں، تم اس سحونت زدہ اونٹنی سے پوچھ لو کہ اس کے پہلو پر کتنے خون بہے،تم ان نفوس سے سوال کرلو کہ کس جرم میں انہیں جان گنوانی پڑی ، ان روحوں سے دریافت کرو کہ وہ کیوں ضائع کی گئیں؟ 
میں اما ں عائشہ کو ان تمام تباہیوں کا ذمہ دار نہیں ٹھرا رہا اور میری کیا بساط کہ میں ام المؤمنین پر انگلی اٹھانے کی جرأت کروں؟ لیکن میں اتنا ضرور کہونگا کہ جب انہوں نے غیر فطری کام میں خود کو مشغول کر لیا، اور اسلام نے جس کا مطالبہ نہیں کیا ہے، اس میں پڑ گئیں،تو یہ افسوسناک امور رونما ہوئے!
یہ بات بھی سمجھنے سے متعلق ہیں کہ ہم جب عورت کو سیاست سے دور رکھنے کی بات کرتے ہیں تو اس کے پیچھے ہمارا  مقصد یہ نہیں ہوتا کہ ہم ان کی آزادی اور سامان دلچسپی سلب کرلیں اور بھلائی کے سارے دروازوں پر اس کے لئے قفل ڈال دیں،بلکہ ہم یہ چاہتے ہیں کہ عورت کو سیاست کی غلاظت اور اس کی بھٹی سے اٹھنے والے شعلوں سے محفوظ رکھ سکیں!
اس بزرگ وبرتر خاتون کی زندگی کا ایک اہم پڑاؤ وہ بھی ہے جہاں  انہیں ایسی ناروا تہمت کا سامنا کرنا پڑا جس کا حقیقت سے اسی قدر فاصلے کا رشتہ ہے جتنا کہ  زمین کا آسمان سے،وہ آسمان جس کی بلندی سے ان کی برائت میں وہ آیتیں نازل ہوئیں کہ جنہیں قیامت تک نمازوں میں دہرایا جاتا رہیگا ، انہیں اللہ نے بطور درس وعبرت کے ہمارے لئے جاوداں کردیا تاکہ افضل واکمل ترین عورت کی زندگی کایہ سبق آموز موقف دنیا کی عورتوں کو شبہات اور فتنوں سے دور رہنے کی تلقین کرتا رہے، گرچہ وہ تقوی وپرہیزگاری او ر طہارت وپاک دامنی  کے اوج ثریا پر ہی کیوں نہ فائز ہوں ، انہیں یہ یاد رکھنا چاہئے کہ جب ام المؤمنین عائشہ رضی اللہ عنہا پر تہمت لگائی جا سکتی ہے تو دنیا کی کوئی عورت بھلا کیسے اس سے بری رہ سکتی ہے!

اماں  عائشہ کی وفات کو 14 صدی سے زائد ہوگئے، لیکن دنیا ان کی ہم مثل نہ دیکھ سکی ، اور میں کہتا ہوں کہ اس ارض گیتی پر اماں  عائشہ جیسی زیادہ مثالیں نہیں جنم لے سکتیں۔اللہ ان سے راضی ہو اور جنت میں ان کے درجات بلند فرمائے!  

تاریخ انسانی کا سردار


اردوقالب: سیف الرحمن حفظ الرحمن تیمی                                                       تحریر: علی طنطاوی

ہجرت کی چند جھلکیاں:
ہم ابھی مکہ میں ہیں جہاں قریش اور محمد کے درمیان توحید و شرک اور اصلاح وجمود کی جنگ جاری ہے، قریش نے اس جنگ کو سر کرنے کے لئے اپنی ساری قوت جھونک دی ہے، مال ودولت کا انبار لگادیا ہے، اور اپنی پوری دنیا صرف ایک مقصد کے لئے داؤ پر لگا دیا ہے کہ محمد نام کے اس بھلائی کو دنیا سے روک کر رکھا جائے۔
محمد کہتے ہیں: میرا راستہ چھوڑ دو میں وسیع دنیا میں نکلنا چاہتا ہوں، تاکہ کمزوروں  کی مد د کر سکوں، مظلوموں  کو سہارا دے سکوں، انسانوں کو انکی کھوئی ہوئی عزت اور عقل کی سلامتی  واپس دلا سکوں، وہ کہتے ہیں:نہیں،نہیں
محمد کہتے ہیں: میرے پیغام کو دنیا میں پھیل جانے دو، کیونکہ یہ کسی خاص شہر کے لئے نہیں آیا اور نہ کسی خاص وقت کے لئے آیا ہے، قریش کہتے ہیں: نہیں نہیں، ہمیں منظور نہیں، ہاں اگر تم چاہو تو تمہیں ہم اپنا بادشاہ بنا لیتے ہیں، تمہیں اپنے مال ودولت کا مالک بنا دیتے ہیں، اور پورے شہر کی سرداری سونپ دیتے ہیں۔
تاریخ قریش کے اس رد عمل  پر ہنس پڑتی ہے،محمد انہیں پوری زمین کی سرداری اور دنیا کی بادشاہت عطا کرنا چاہتے ہیں، ان کے ہاتھوں میں علم ومعرفت، مال ودولت اور  قیصروکسری  کے خزانوں کی کنجیاں دینے کی بات کرتے  ہیں اور وہ ہیں کہ محمد کو صحرائی ریتوں کے پیچھے دو پہاڑوں کے درمیان گمنام سے اس گاؤں کی امارت دیکر بہلانا چاہتے ہیں۔
جب لالچ اور امید دلانے سے بات بنتی نہیں دکھائی دیتی ہے تو یہ لوگ تکلیفیں دینے اور ڈرا دھمکا کر آپ کو قائل کرنا چاہتے ہیں، چلتے ہوئے آپ کے راستے میں  کانٹے ڈال دیتے ہیں ، بہ حالت سجدہ آپ  کی گردن مبارک پر اونٹ کا اوجھ رکھ دیتے ہیں، طائف میں آپ پر سنگ باری کی جاتی ہے یہاں تک کہ آپ خون آلود ہو جاتے ہیں، آپ کا مزاق اڑا یا جاتا ہے ، آپ کی تحقیر کی جاتی ہے  اور آپ کے پیچھے اوباشوں کو چھوڑ دیا جاتا ہے ۔
اس سب کو باوجود آپ ذرا بھی غصہ نہیں ہوتے ، بلکہ آپ کی رحمت اور بڑھ جاتی ہے، بالکل اسی طرح جس طرح بڑے بزرگ کو اپنے چھوٹوں پر پیار آجاتا ہے، اور صاحب عقل وخرد انسان کو مجنون وپاگل شخص  پر ترس آجا تا ہے،آپ کا جواب ہوتا ہے : اے اللہ ! ہماری قوم کو ہدایت دے کہ یہ سمجھتے نہیں۔
قریش کا کوئی بھی حربہ آپ کو اپنے موقف سے باز نہیں  رکھ پاتا ، بلکہ یہ اتنا ہی ناممکن تہا جتنا کہ کسی پتہر کی چوٹ یا پہول کی ضرب سے چاند کو اس کے مدار سے پہیرنا ۔
 قریش  پہلے پہل اسلام قبول کرنے والوں کو ننگے تن کھلے بدن تپتی ریت پر لٹا دیتے  پھر پانی دکھا کر کہتے :محمد کے رب کا انکار کرو ہم تمہیں سیراب کر دینگے، تمہیں چھوڑ دینگے، وہ کہتے : وہ تو ایک ہے ، وہ تو ایک ہے!
رب سے سرگوشی  کی لذت نے عذاب کی سوزش سے انہیں بے نیاز اور حصول جنت کی شدید امید نے دنیاوی درد والم کوان کے ذہن سے کافور کردیا تھا۔
اللہ کے راستے میں انہوں نے سب کچھ برداشت کیا، زدوکوب ، زخم، سوزش وتڑپ، بھوک وپیاس، اور رت جگے کی ساری مصیبتیں جھیلیں، اللہ کے لئے تمام تلخیوں کو جام شیریں سمجھ کر گھونٹ گئے، اللہ کی رضا کی خاطر مکروہ اور مبغوض چیزوں کو بھی محبوب بنا لیا۔
رسول گرامی نے انہیں ان سب سے بھی زیادہ سخت جان آزمائش کی طرف بلایا، گھر بار اوردار ودیار چھوڑنے کو کہا، دین وایمان کی سلامتی کے لئے ایک ایسے انجان ملک کو ہجرت کرجانے کو کہا جہاں کوئی بھی انکا شناسا نہ تھا، وہ زمین انکے لئے اجنبی تھی، وہاں کی زبان  بھی انکی زبان سے مختلف، انکے دین بھی انکے دین سے جدا، انہیں حبشہ کی اس سرزمین کوہجرت کرجانے کا حکم ہوا جہاں نصرانیوں کے ساتھ انہیں واسطہ پڑنا تھا، تاہم  حبشہ کے یہ نصرانی عرب کے مشرکین سے بدرجہا بہتر تھے ، مؤمنوں کے لئے لوگوں میں سب سے زیادہ خیر خواہ یہی نصاری ہیں (مائدہ:۲۸)
انہوں نے آپ کی یہ پکار بھی سنی، اپنے گھروں سے  نکل گئے، اہل خانہ کو الوداع کہ دیا، حبشہ کی طرف روانہ ہوگئے، لیکن قریش کی ایذا رسانی حبشہ تک انکا پیچھا کرتی رہی، قریش کفر وسرکشی میں ساری حدیں پھلانگ گئے، ان کا راستہ روکنے کے لئے  پورا زور صرف کردیا، لیکن قریش کی کیا بساط کہ نور الہی کو ذرا بھی مدھم کر سکے!
دھواں کی فطرت ہے بلند ہونا، اسے کسی بوتل میں قید نہیں کیا جاسکتا، اگر ایسی کوشش کی گئی تو وہ اپنا راستہ خود بنا لیگا یا شیشہ توڑ کرراہ نکال  لیگا، عین یہی معاملہ اسلام کا بھی ہے۔
اسلام کی فطرت میں قدرت نے لچک دی ہے
اتنا ہی یہ ابھرے گا جتنا کہ دباؤگے
مسلمانوں نے دوسری مرتبہ بھی ہجرت کی، لیکن اس بارایک  عرب ملک کی طرف ہجرت کرنی تھی، ایک ایسی سرزمین کی طرف کوچ کرنا تھاجسے اللہ نے محمد عربی کی آمد سے پہلے تک صحرائی ریتوں کے پیچھے گمنام  کرکے زمانے کی نظر سے چھپا کر رکھا تھا، محمد کے پاؤں اس پر پڑ نے تھے کہ وہ ام المدائن ہو گیا، شہروں کی راجدھانی بن گیا، جہاں سے بھلائی اور ہدایت کے سوتے پھوٹ پھوٹ کر سارے عالم کو آب ہدایت سے سیراب کرنے لگلے، ہر جگہ اس کی بھلائی پہنچنے لگی، اور ساری دنیا سے سلطنت، بادشاہی اور بے نیازی کے دھارے اس طرف بہنے لگے۔
تمام کے تما مسلمان ہجرت کرگئے، مکہ میں صرف نبی اور انکے دو ہم راز رہ گئے، ایک کو آپکا رفیق سفر بننا تھا اور دوسرے کو مکہ میں آپکی نیابت کرنی تھی، ان دونوں نے سب سے پہلے اسلام قبول کیا اور سب سے اخیر میں ہجرت کی، بزرگوں کے سردار حضرت ابوبکر اور نوجوانوں کے سر براہ حضرت علی رضی اللہ عنھما۔
محمد اپنے تمام ساتھیوں سے پیچھے رہ گئے تھے بالکل اسی طرح جس طرح  کسی مائل بہ خطر سفینے کا ناخدا اس وقت تک کشتی سے نہیں اتر تا جب تک سارے سوار ساحل سے ہمکنار نہ ہوجائیں، اور جس طرح کہ کوئی امانت دار چرواہا کسی چٹیل میدان سے اس وقت تک نہیں نکلتا جب تک کہ سارا ریوڑ بہ سلامت نہ نکل جائے، آپ  نے اسی لئے ہجرت کرنے میں تاخیر کی تاکہ آپ کے سارے ساتھی سہی سالم نکلنے میں کامیاب ہوجائیں اور آپ بذات خود سینہ سپر ہوکر خطرات کا سامنا کرتے رہیں۔اب خطرہ پوری تابانی کے ساتھ سامنے آکھڑا ہوا، چاروں طرف سے خطرات کے بادل نے آپ کو آگھیرا، قریش کے سربراہان تاریخ کے سب سے بڑے جرم کوروبہ عمل لانے کے لئے سر جوڑے بیٹھے تھے، ایک ایسا جرم پایئہ تکمیل کو پہنچنا چاہ رہا تھا کہ  اگر وہ  پورا ہوجاتا توتاریخ میں دمشق وبغداد، اور قاہرہ و قرطبہ کے سنہرے نام نہ ہوتے، نہ راشدین کی حکومت ہوتی، نہ امویوں کی خلافت کا کوئی ذکر ہوتا، نہ عباسیوں  کے تذکرے ہوتے، نہ عثمانیوں کے ہاتھوں قسطنطنیہ کے فتح ہونے کا شور ہوتا،نہ جامع اموی کی عمارت ہوتی، نہ نظامیہ اور حمرا کے قلعے ہوتے، اور نہ تہذیب وثقافت کے وہ نمونے ہوتے کہ جن سے  اہل یورپ نے اپنی تہذیب کشید کئے۔پہلے شام کی صلیبی جنگوں سے پھر اس کے بعد اندلس کے میراث تمدن سے۔اگر یہ جرم اس  زمین پر انجام پاگیا ہوتا تو تاریخ کی کایہ پلٹ ہوجاتی، لیکن آج ہم ایسی حالت میں ہیں کہ اللہ ہی بہتر جاننے والا ہے۔
اس مقام پر محمد عربی کی مردانگی اور بہادری کے جوہر کھلتے نظر آتے ہیں، آپکی ثابت قدمی جھلکتی ہوئی دکھتی ہے،اللہ اپنے اولیاء کی مدد کرتا ہے، اس کا مظہر واضح طور پر سامنے آتا ہے،  محمد دروازہ کھولتے ہیں ، صفیں چیرتے ہوئے باہر نکلتے ہیں،آپ کے خون کے پیاسوں کاایک غول ہوتا ہے جسے آپ پار کرجاتے ہیں اور یوں اللہ کا ارادہ مکمل ہوجاتا ہے،اس فوری اقدام سے قریش میں کھلبلی مچ جاتی ہے، انکی نگاہیں بے نور ہوجاتی ہیں، ان پر غشی کی کیفیت طاری ہو جاتی ہے، جب تک وہ ہوش میں آتے ہیں تب تک محمد اپنا کام کرچکے ہوتے ہیں، جب انکی آنکھیں کھلتی ہیں تو انہیں لگتا ہے وہ خواب  دیکھ رہے تھے ،دروازہ کھول کر آپکی تلاشی لی جاتی ہے، آپ کے بستر مبارک پر کوئی اور ہی سو رہا ہوتا ہے، وہ آنکھیں پھاڑ کر دیکھتے ہیں اور حیرانی سے لمبی سانس لیتے ہیں،اب  جاکر انہیں حقیقت حال کی خبر لگتی ہے، مکہ کے گردونواح میں یہ خبر جنگل کی آگ کی طرح پھیل جاتی ہے، قریش اپنے گھوڑے دوڑا دیتے ہیں، سب کے سب حیران وششدر  چاروں طرف پھیل جاتے ہیں کہ محمد کا سراغ مل جائے۔
انہیں کیا ہوگیا ہے؟ وہ گھروں کے نگہبان اور میدان جنگ کے شہسوار ہیں ، لیکن آج خوف وہراس سے ان کی عقل ماؤوف سی ہوگئی ہے،  وحشت نے انکو دل شکن کردیا ہے۔
لوگو! تمہیں کیا ہوگیا ہے؟ کہتے ہیں:محمد نکل پڑا ہے۔
تمہیں محمد کی کیوں پڑی ہے؟ کیا وہ تمہارے مال لے بھا گا ہے؟  کہتے ہیں:اللہ کی پناہ ،وہ تو امین ومامون ہے، اس نے ساری امانتیں بھی لوٹادیں!
تو کیا اس نے کوئی جرم کیا ہے کہ تم اس کے سراغ میں لگے ہو؟ کہتے ہیں:اللہ کی پناہ، وہ لوگوں میں سب سے زیادہ اچھے اخلاق کا حامل اور ہاتھ کا بڑا صاف ستھرا انسان ہے!
تو آخر تمہیں اس سے کیا غرض ہے؟ کہتے ہیں: وہ پوری دنیا کو اپنی فوج میں شامل کرلیگا تاکہ ہمارے خدائوں اور بتوں کے خلاف محاذ کھڑی کرے، وہ ہمیں ان جامد وساکت پتھروں کو توڑنے پر مجبور کردیگا، اور ایک اللہ کی عبادت پر اصرار کریگا،وہ ہمیں ہدایت، بھلائی اور سچائی کی پیروی کرنے کوکہیگا۔
کیا اسی وجہ سے تم محمد سے انتقام لینا چاہتے ہو؟
تاریخ ایک بار پھر قریش پر ہنس پڑتی ہے!
قریش کو رسوا ہوکر الٹے پاؤں لوٹ جانا پڑتا ہے،وہ پوے جزیرئے عرب کو محمد کے خلاف ورغلانا شروع کردیتے ہیں،محمد کو زندہ یا مردہ کسی بھی حال میں حاضر کرنے  والے کے لئے سو اونٹ کا انعام رکھا جاتا ہے۔
جب محمد اور انکے رفیق سفر غار سے نکلتے ہیں تب ہی ایک گھڑ سوار انکے پیچھے ہو لیتا ہے،ابوبکر ایک پل کے لئے ڈر جاتے ہیں، اور کہتے ہیں: بخدا مجھے اپنی ذات کا خوف نہیں بلکہ مجھے آپکی فکر لگی ہوئی ہے، محمد اس لمحہ ایک ایسی بات کہتے ہیں جس میں ایمان کے سارے  معجزے اپنی تمام تر شکلوں کے ساتھ پیوست ہیں، شجاعت وبہادری، قربانی وجاں نثاری، ثبات و استقامت، اور ایثار وہمدردی کے سارے صفات اس ایک جملے میں موجزن ہیں،آپ فرماتے ہیں: لا تحزن ان اللہ معنا،، غم نہ کر ، یقینا اللہ ہمارے ساتھ ہے!
بلا شبہ اللہ اس کے ساتھ ہے جو اللہ کے ساتھ ہے، یقینا اللہ اس کی مد د کرتا ہے جو اللہ کی مدد کرتا ہے، جس کو اللہ کی معیت وہمراہی حاصل ہو، اسے ہر گز غمزدہ نہیں ہونا چاہئے اور نہ ہی دل چھوٹا کرنا چاہئے۔
 وہ پیشانی جس پر معیت الہی کی چمک ہوتی ہے، وہ کبھی خاک آلود  اور شکست یافت نہیں ہو سکتی  گرچہ پورا وجود اس کے خلاف محاذآرا کیوں نہ ہوجائے!
یہ قافلہ دنیائے بے کراں کی طرف چل پڑتا ہے، قافلہ بہت معمولی ہے، لیکن یہ روئے زمین جس پر ہم آبلہ پائی کرتے ہیں، پہلی بار ایسے عظیم کارواں کی آمد سے سرفراز ہو رہی تھی،اس سے پہلے کبھی اس قدر بلند ہدف،پاک مقصد،خلوص نیت،اور اثر انگیز قافلہ کا تجربہ اس ارض گیتی  کے حصہ میں نہیں آیا تھا، وہ پہلے کبھی ایسے مسافروں سے آشنا نہیں ہوئی تھی،یہ مٹھی بھر لوگ خاموش صحرا سے گزر رہے  تھے، نہ انکے ہاتھ میں جھنڈے تھے نہ کوئی پرچم، نہ ہی ڈھول تاشے ، نہ ہی محمد کے دونوں طرف کھڑے ہوئے لشکر جرار، اور نہ کھڑکیوں سے تالیاں لگانے والے تماشائی،ہاں اتنا ضرور تھا کہ اس بے زبان ریگستان کی ریت خوشی میں تالیاں پیٹ رہی تھی کہ کل کو یہی قافلہ ہمیں شادابی اور نمو کی دولت سے مالا مال کریگا،صحرائی پہاڑ اس امید پر جھوم رہے تھے کہ عنقریب انکی چوٹیوں پر عزت ونصرت کے جھنڈے نصب کئے جائینگے، اور پردئہ غیب سے قائدین،علما‌ء اور ادباء کے وہ سرخیل دستے رونما ہورہے تھے جنہیں کاروان محمد کی صحرا نوردی سے وجودپزیر ہونا تھا۔
جب کارواں مدینہ پہنچنے کو ہوتا ہے تو یہاں بھی ایک مجمع انکا منتظر ہوتا ہے جس طرح مکہ چھوڑتے ہوئے آپ کے سامنے ایک صف بستہ مجمع تھا، لیکن فرق صرف اتنا سا ہوتا ہے کہ وہاں برے ارادے  سینے میں چھپے ہوتے ہیں اور یہاں بھلائی کا سیلاب  زمین پر امنڈرہا ہوتا ہے، کوئی محمد کے نام پر جان قربان کرنے کی ندا لگاتا ہے تو کوئی حیات آفریں کہتا سنا جاتا ہے۔
یہ در اصل اسلامی تاریخ کا نقطئہ انقلاب ہوتا ہے، اس کے پہلے صرف شکست کی داستان ہوتی ہے اور اس کے بعد نصرت وتمکنت کی پے درپے  تاریخ رقم ہونی رہتی ہے،اسی لئے ہم نے اس واقعہ کو اپنی تاریخ کا نقطئہ آغاز بنایا ہے!
ہم ابھی دہلیز مدینہ پر ہیں،محمد کے استقبال میں پورا مدینہ اٹھ آیا ہے،فرط محبت کا عالم یہ ہے کہ اگر انکے بس میں ہو تو جگر کے ٹکڑے فرش راہ کردیں تاکہ دلوں کی سیج پر چل کر محمد مدینہ میں داخل ہوں، ہر طرف سے یہ ترنم بھری آواز کانوں میں رس گھول رہی ہے:
طلع البدر علینا
من ثنیات الوداع
وجب الشکر علینا
ما دعا للہ  داع
لوگ پوچھ رہے ہیں: کون ہے وہ؟ محمد کون ہے؟
وہ انہیں پہچان بھی نہیں پاتے ہیں کیونکہ نہ انکے جسم پر حریر وریشم کے شاہی لباس  ہوتے  ہیں ،نہ  انکے چال ڈھال میں بادشاہوں والی اکڑ، اور نہ انکے سر پر کوئی تاج ہی سجا ہوتا ہے کہ فورا پہچان لئے جائیں، بلکہ وہ تو اللہ کا خاکسار بندہ ہیں، وہی  پہنتے ہیں جو لوگوں کا لباس ہے،وہی کھاتے ہیں جو لوگوں کی عام خوراک ہے،اگر لوگ بھوکے ہوتے ہیں تو یہ بھی فاقہ ہی پر گزر بسر کرتے  ہیں،اگر انہیں شکم سیری ہوتی ہے تو یہ بھی شکم سیر ہوتے ہیں،ان کے ساتھیوں میں بہت سے خوشحال اور فارغ البال لوگ بھی ہیں، لیکن محمد نے گدائی کو شاہی زندگی پر ترجیح دی اور اسی حال میں موت کا بھی استقبال کیا۔
لوگوں نے ابوبکر کو دیکھ کر سمجھا کہ یہی محمد ہیں، وہ انہیں سلام کرتے ، اور وہ رسول گرامی کی طرف اشارہ کرکے کہتے : یہ ہیں محمد۔
وہ سب کے سب یہی چاہتے تھے کہ آپ انکے یہاں مہمان ہوں تاکہ آپکی ضیافت کا شرف انکے حصہ میں آئے۔اس موقع پربھی آپ نے حکمت عملی سے کام لیا،آپ ہرگز یہ نہیں چاہتے تھے کہ کسی کی دعوت کا انکار کرکے اسے تکلیف پہنچائیں، آپ نے کہا:اونٹنی کو چھوڑ دو،وہ حکم الہی کا پابندہے، یہاں تک کہ  اونٹنی خود ہی حضرت ابو ایوب  انصاری کے دروازے پر آکر بیٹھ گئی،وہ ابو ایوب جس کے لئے تقدیر نے یہ فیصلہ کیا کہ قسطنطنیہ کی جنگ میں شریک ہوں اور موت کا شیدائی بن کر دشمن کی بھیڑ میں گھس جائیں جہاں انہیں جام شہادت پیش ہو اور وہ رب حقیقی سے جا ملیں،چنانچہ ایسا ہی ہوا اور انہیں بوسفور کے ساحل پردفن کر دیا گیا، جہاں سے انکی قبر لمبے عرصے تک مسلمانوں کو  فتح  قسطنطنیہ کی دعوت دیتی رہی یہاں تک کہ یہ تاریخ ساز کارنامہ محمد الفاتح کے ہاتھوں انجام پذیر ہوا۔
ابھی ہم محمد کے ساتھ مدینہ میں ہیں ، وہ ایک نئی حکومت کی بنیاد ڈال رہے ہیں، آپ کی رائے میں وہ کس کام سے اس کا آغاز کرینگے؟ ایک شاندار محفل سجائینگے جس میں انکی بادشاہت کی بیعت لی جائیگی؟ وہ تو بادشاہت کی چاہت ہی نہیں رکھتے!
کیا وہ کوئی فوجی مرکز قائم کرینگے ، جشن منائین گے اور لشکر بندی فرمائین گے؟ وہ تو زمین میں برتری کے قائل ہی نہیں!
کیا وہ ٹیکس نافذ کرینگے؟ نہیں، وہ آغاز ایک مسجد کی تعمیر سے کرینگے۔
یہ ایک بڑامظہر اور بلند نظریہ ہے جہاں قاری کو ٹھہر کر سوچنا چاہئے ، آپ اپنی حکومت کا آغاز مسجد سے کرتے ہیں جس طرح اللہ نے آپ پر نزول وحی کی ابتداء لفظ اقرأ  اور قلم سے کیا۔آپ شروعات مسجد سے کرتے ہیں اور اسلام میں مسجد عبادت گاہ ہے جو ایمان کی نشانی ہے، مسجد پارلیمنٹ بھی ہے جو عدل کی علامت ہے، مسجد درسگاہ بھی ہے جو علم کا مرکز ہے، آپ مسجد کی تعمیر کے لئے جگہ کا انتخاب غصب اور لوٹ گھسوٹ سے نہیں کرتے بلکہ پیسوں کے عوض اسے خریدتے ہیں جو درحقیقت انصاف کا اعلامیہ ہے، آپ چاہتے تو مسجد کی تعمیر کا حکم صادر فرما کر خود آرام کرنے بیٹھ جاتے ، لیکن نہیں، بلکہ اپنے ساتھیوں کے ساتھ خود بھی کار تعمیر میں بھڑ گئے، اپنے ہاتھوں سے پتھر اٹھائے، جس  سے  جمہویت کا عملی نمونہ جھلکتا ہے، آپ نے مسجد کو مٹی اور اینٹ سے تعمیر کیا ، نقش ونگار سے کلی اجتناب فرمایا جو  خوئے سادگی کو درشاتا ہے۔
  ایمان، عدل وانصاف، علم  ومعرفت، یکسانیت و جمہوریت اور سادگی کے یہ رموز  باہم ملکر  دین اسلام کی مجموعی شکل اور شعائر دین کی دلنشیں تصویر پیش کرتے ہیں۔

السبت، أغسطس 29، 2015

اردو کا اسلامی لٹریچر : جائزے کی ضرورت ہے !

ثناءاللہ صادق تیمی ، مکہ مکرمہ ،  سعودی عرب

 اکثر ایسا محسوس ہوتا ہے کہ ہماری اکثریت تقلیدی ذہنیت رکھتی ہے ۔ یہاں تقلیدی ذہنیت سے مراد ائمہ اربعہ کی فقہی تقلید نہیں ہے ۔ کہنے کا مطلب یہ ہے کہ ملی سطح پر اکثر یہ دیکھا جاتا ہے کہ جس طرف ایک چل پڑا سب چل پڑے ۔ ہم نئی راہ نکالنے کا کم ہی سوچتے ہيں ۔ اسی لیے بہت کم ایسا دیکھنے کو ملتا ہے جب کوئی ایسی چیز سامنے آتی ہو جسے دیکھ کر آپ مارے خوشی کے بالکل اچھل پڑیں اور ساتھ ہی آپ کو حیرت و استعجاب بھی ہو ۔ وجہ ظاہر ہے کہ ہم کرتے تو ہیں باتیں آزادی ، اجتہاد اور بلندی افکار کی لیکن چلتے ہیں ہمیشہ اسی راہ پر جس پر سب چلتے ہیں ۔ ہمارے یہاں ایک عجیب و غریب رویہ یہ پنپ چکا ہے کہ اگر کبھی کسی بڑے انسان سے کسی رائے میں اختلاف کیجیے تو لوگ سمجھتے ہیں کہ اس بڑے انسان کی بے عزتی ہوگئی ، حالانکہ اختلاف رائے کا بے عزتی سے کوئی تعلق نہیں ۔ بدتمیزی اور اختلاف رائے میں آسمان زمین کا فرق ہے ۔ اور یاد رہے کہ جب تک ہماری نسل سچ کہنے اور سچائی کی راہ میں بزرگوں سے اختلاف کرنے کا حوصلہ پیدا نہیں کرے گی وہ ترقی کی طرف اپنا قدم نہیں بڑھا پائے گی ۔ ہمیں یہ بات ذہن نشیں کرنی ہوگی کہ خطرہ مول لیے بغیر بڑی بلندیاں مشکل سے ہی ہاتھ آتی ہیں ۔
     اب ذرا اردو کے اسلامی رسالوں اور اردو اسلامی لٹریچر پر ہی ایک نظر ڈال لیجیے ۔ جس مکتب فکر کے رسالے آپ ہاتھ میں اٹھالیں سب کا طرزو انداز یکساں نظر آئے گا ۔ مثال کے طور پر ایک اہل حدیث ادارے سے نکلنے والے کسی ایک ماہنامے کو سامنے رکھیے اور پھر دوسرے کسی اہل حدیث ادارے سے نکلنے والے رسالے کو سامنے رکھیے آپ کو کوئی بہت بڑا فرق نظر نہیں آئے گا ۔ اسی طرح کسی دیوبندی مکتب فکر یا بریلوی مکتب فکر کے رسالے کو اٹھالیجیے آپ کو صورت حال ایسی ہی نظر آئے گی ۔ یہ سب در اصل تقلیدی ذہنیت کی اپج ہے ۔ ایک رسالہ مقبول ہوا سب نے اسی رسالے کی نقالی کرنی شروع کردی ۔ بالکل ایسے ہی جیسے پانچ سال سات پہلے ایم بی اے کرنے والوں کی کھپت زیادہ تھی ، اب جسے دیکھو ایم بی اے کررہا ہے ۔ پتہ چلا کہ اب ایم بی اے ہی ایم بی اے ہے ۔ نہیں ہے تو جاب نہیں ہے ۔
  مجھے یہ بات کم ہی سمجھ میں آتی ہے کہ جب ایک طرح کا رسالہ نکل ہی رہا ہے تو پھر اسی طرح کا ایک دوسرا رسالہ کیا ضروری ہے ۔ ٹھیک ہے کہ ہر ایک کا اپنا دائرہ ہوتا ہے اور ایک سطح پر اس کی افادیت سے انکار بھی نہیں لیکن سوال یہ ہے کہ کیا ہم تھوڑا الگ نہیں سوچ سکتے ؟ کیا ذرا نیا راستہ نہیں اپنا سکتے ؟ کیا کوئی نیا تجربہ نہیں کرسکتے ؟ کیا نئے تجربوں کی ضرورت نہیں ہے ؟ کیا اور ایسے گوشے نہیں ہیں جن پر توجہ صرف کی جاسکتی ہو ؟ روایتی اور تقلیدی دائرے سے نکل کر ان دائروں تک نہیں پہنچا جا سکتا جہاں ضرورت بھی شدید ہے اور جہاں کچھ پایا بھی نہیں جاتا ؟
         عام طور سے مدارس سے تعلیم مکمل کیے بنا نکل جانے والے لوگ جو ابتدائیہ ، متوسطہ یا زیادہ سے زيادہ ثانویہ تک کی تعلیم حاصل کرپاتے ہیں اور جنہیں اردو پڑھنے آتی ہے ۔ اسی طرح وہ لوگ جو گورنمنٹ اسکولوں میں میٹرک وغیرہ کرکے تعلیم چھوڑ دیتے ہيں اور جنہیں اردو پڑھنے آتی ہے یا پھر وہ خواتین جن کی گھریلو تعلیم ہوتی ہے ۔ جنہیں قرآن کریم اور اردو پڑھنا آتا ہے ۔ کیا ہمارے پاس ان کے لیے کوئی لٹریچر ہے ؟  جب مذکورہ لوگوں کے بارے میں بات ہورہی ہے تو یہ بتانے کی ضرورت نہیں کہ ان کی استعداد اتنی زيادہ بھی نہیں ہوتی کہ وہ ان رسالوں سے استفادہ کرسکیں جو ہمارے دینی اداروں سے نکلتے ہیں ۔ ان کی استعداد یہ ہوتی ہے کہ وہ پیام تعلیم ، امنگ اور خاتون مشرق قسم کے رسالوں سے استفادہ کرسکیں ۔ اسی لیے ایسے لوگوں کے یہاں زيادہ تر خاتون مشرق ، پاکیزہ آنچل اور ہما وغیرہ کا ہی رواج دیکھنے کو ملتا ہے ۔ ہمارے دینی حلقوں کی کمی یہ ہے کہ وہ مذکورہ طبقے کی تربیت کے بارے میں سوچتے ہی نہیں ۔
    شمالی بہار کے اہل حدیث گھرانوں میں پہلے سواء الطریق کا چلن تھا ۔ ارباب حل وعقد کی دانشمندی دیکھیے کہ اب اس کتاب کا تذکرہ ہوتا ہے، کتاب کی صورت دیکھنے کو نہيں ملتی ۔ دیوبندی مکتب فکر کے لوگ اپنی بچیوں کو شادی کے موقع سے بہشتی زیور دیا کرتے تھے لیکن یہ سچ ہے کہ انہوں نے بھی اس کی تہذیب کی طرف دھیان نہیں دیا اور اس طرز پر ذرا بہتر اور جاذب اسلوب میں اس طرح کی کوئی اور چیز تیار کرنے کی کوشش نہیں کی ۔ بریلوی حضرات کے یہاں اس طرف آکر دینی رسالوں کے نکالنے کا رجحان بڑھا ہے لیکن ان کا رویہ بھی اس معاملے میں یکساں ہے ایسے شاید انہیں اس لیے پریشان ہونے کی ضرورت نہیں کہ خاتون مشرق اور پاکیزہ آنچل وغیرہ کے توسط سے جو دین مسلم گھروں میں داخل ہوررہا ہے وہ وہی دین ہے جن کے یہ ماننے والے ہیں ۔ جماعت اسلامی کا رویہ اچھا رہا ہے انہوں نے حجاب اسلامی ، بتول ، حسنات اور ذکری  جیسے رسالوں سے اس کمی کو پورا کرنے کی کوشش کی ہے لیکن ہم سب جانتے ہیں کہ جماعت اسلامی کی رسائی محدود ہے ۔ ان کا اثر محدود ہے ۔ اگر ایسی کوششیں دوسری جماعتیں اپنی سطح سے بھی کریں توایک اچھی شروعات ہو سکتی ہے ۔ اسی طرح ہمارے یہاں بچوں کا کوئی دینی رسالہ نہیں پایاجاتا ۔ یہ بوجھ بھی جماعت اسلامی والے ڈھوتے رہے ہیں ۔ حکومتی اداروں سے بعض بچوں کے رسالے نکلتے ہیں جیسے امنگ اور بچوں کی دنیا لیکن ان کا مقصد دینی تربیت نہیں ۔ یہ الگ بات ہے کہ ان کی اہمیت سے بھی انکار نہیں کیا جاسکتا۔ اسی طرح ہمارے دینی اداروں سے ایسے رسالے نہ کے برابر نکلتے ہیں جنہيں خالص علمی اور تحقیقی رسالوں کا نام دیا جاسکے ۔ دوسرے ملکوں کے لوگ جب کبھی یہ پوچھتے ہيں کہ آپ کے یہاں سے کوئی قابل ذکر علمی تحقیقی دینی رسالہ نکلتا ہو تو بتائیے تو ہمیں بغلیں جھانکی پڑتی ہے ۔  سوال یہ ہے کہ کیا ہم اس جانب توجہ دینے کو تیار ہیں ؟ یا پھر ہمیں لگتا ہی نہیں کہ اس کی ضرورت بھی ہے ؟ کیا خاتون مشرق ، پاکيزہ آنچل اور امنگ کے اسلوب میں صحیح خالص دین کو پیش کرنے کی کوشش نہیں کی جاسکتی ؟ کیا قرآنی قصے خوبصورت اردو میں نہیں ڈھالے جاسکتے ؟ کیا صحابہ کرام کی زندگیوں سے لوگوں کو نہيں جوڑا جاسکتا ؟ کیا اسلامی عقائد کی آسان اور سہل تشریح و تعبیر نہیں کی جاسکتی ؟ کیا اسلامی تاریخ کے روشن واقعات دلچسپ پیرایے میں نہیں پیش کیے جاسکتے ؟
ثناخوان تقدیس مشرق کہاں ہیں ؟
    پچھلے دنوں مدینہ منورہ کے سفر کی سعادت حاصل ہوئی ۔ جامعہ اسلامیہ مدینہ منورہ میں فاضل طلبہ سے گفتکو کے درمیان میں نے جب یہ بات رکھی تو انہوں نے اس سے اتفاق کیا ۔ ہم نے ان سے گزارش کی کہ وہ اپنے دوستوں سے اس موضوع پر گفتگو کریں ، اس کے امکانات پر غور کریں اور پھر ان شاءاللہ اس طرف عملی اقدام کے بارے میں سوچیں ۔ میرا ذاتی طور پر یہ تاثر بہت گہرا رہا ہے کہ اگر اس جانب قدم بڑھایا جائے اور تھوڑی ایماندارانہ کوشش کی جائے تو بڑے حوصلہ افزا نتائج حاصل ہو سکتے ہیں ۔ اپنی نسل کی تربیت ہماری ذمہ داری ہے ۔ یاد رہے کہ اگر شروع سے ان کے اندر اسلام کو بٹھادیا گیا تو پھر کوئی آندھی انہیں ہلا نہیں پائے گی ۔ ایک ایسے ملک میں جہاں سسٹم آپ کے پاس نہ ہو اور جہاں قدم قدم پر غیر اسلامی افکار و خیالات اور مظاہر کی دنیا آباد ہو وہاں اس قسم کی کوششیں بہت ضروری ہوتی ہیں ۔ اللہ ہمیں نیک توفیق دے ۔

الاثنين، أغسطس 17، 2015

سیرت امام احمد بن حنبل رحمہ اللہ کی عصری معنویت
ثناءاللہ صادق تیمی ، اسسٹنٹ پروفیسر ، جامعۃ الامام محمد بن سعود الاسلامیۃ ، ریاض
          اسلامی تاریخ میں شروع عباسی دور کو عصر ذہبی(سنہری دور) کے نام سے جانا جاتا ہے ۔ اس لیے کہ اسی عہد میں علوم و فنون کا ارتقاء عمل میں آیا ۔ حدیث ، تفسیر ، بلاغہ ، جغرافیہ ، طب ، فلکیات ، ادب اور بقیہ دوسرے علوم وفنون کی شاخیں نکلیں اور مضبوط ہوئیں لیکن اسی عہد میں اور خاص طور سے مامون کے زمانے میں بیت الحکمۃ بھی بنایا گيا جس کے اندر یونانی فلسفہ کی کتابوں کا ترجمہ عمل میں آیا اور دیکتھے دیکھتے معتزلہ کے ہاتھوں اپنے ہاتھ پاؤں پسارنے لگا ۔ قرآن کریم اور انبیائی طریق دعوت کا مطالعہ کیجیے تو ایک بات سمجھ ميں آتی ہے کہ اللہ نے قرآن حکیم کے اندر کائنات میں غور و فکر کرنے کا حکم بھی دیا ہے اور یہ بھی بتایا ہے کہ اس غور وفکر کے نتیجے میں انسان کا اللہ پر ایمان مضبوط ہوتا ہے لیکن اللہ کی ذات و صفات میں بے مطلب کی موشگافیوں میں الجھایا نہیں ہے بلکہ امور غیبیہ سے متعلق ایمان لانے کو ہی اصل بتلایا ہے ۔ تمام انبیاء بشمول نبی کائنات محمد صلی اللہ علیہ وسلم کا طریقہ دعوت و عمل یہی رہا ۔ یہی وجہ ہے کہ صحابہ کرام کے اندر ذوق عبودیت کے ساتھ حسن عمل اور جذبہ جہاد موجزن تھا اور دیکھتے دیکھتے انہوں نے ایک دنیا تک اسلام کی سچائی کو پہنچادیا ۔ بنیادی طور پر اسلام اسی سچے عقیدے اور حسن عمل کی دعوت لے کر آیا تھا ۔ لیکن جب یونانی فلسفہ سے مسلمان آشنا ہوئے اور معتزلہ نے اسے نہ صرف یہ کہ قبول کیا اور دین کو فلسفیانہ موشگافیوں کی نذر کیا بلکہ اس کی ترویج و اشاعت بھی شروع کی ۔  وقت وہ تھا کہ اسلامی حکومت کی چولیں مضبوط تھیں ، نظام اپنی جگہ پر پوری طرج چست درست تھا اورعلماء آسانیوں میں تھے ۔ انہوں نے تعقل آمیزی اور فلسفہ طرازی میں خود کو بری طرح لگادیا اور وہاں وہاں اپنی عقل و خرد کے گھوڑے دوڑانے لگے جہاں عقل و خرد کی رسائی تھی ہی نہیں اور یوں پورے عالم اسلام کو ایک عجیب وغریب قسم کی ایمان سوز بدعت میں مبتلا کردیا ۔ اس کا تجزیہ کرتے ہوئے احمد امین جو معتزلہ کے بڑے قدردان اور حامی ہیں ، لکھتے ہیں " ان پر ( معتزلہ ) پر یہ مواخذہ کیا جاسکتا ہے کہ انہوں نے دین کو عقلی مسائل اور منطقی دلائل کے مجموعے میں بدل دیا ۔ یہ منہج فلسفہ میں تو درست ہو سکتا ہے لیکن دین کے معاملےمیں درست نہیں ہوسکتا ۔ اس لیے کہ دین اس سے زیادہ زندہ شعور کا تقاضہ کرتا ہے جتنا کہ منطقی قواعد کرسکتے ہیں " (رجال الفکر والدعوۃ فی الاسلام ص 195 نقلا من ضحی الاسلام )  فتنہ خلق قرآن اسی فلسفہ آمیزی اور تعقل پرستی کانتیجہ تھا جسے مامون کی سرپرستی میں اس کے درباری معتزلی علماء نے اتنا بڑا مسئلہ بنادیا کہ انبیائی طریقہ عمل اور قرآنی و محمدی سنت کے برعکس ایک نئے طرز فکر و عمل کو ناکارنے کے لیے امام احمد بن حنبل رحمہ اللہ کو تاريخ ساز قربانی دینی پڑی ۔
      امام احمد بن حنبل کو بجا طور پر امام اہل السنۃ و الجما‏عۃ کہا جاتا ہے ۔ مانا جاتا ہے کہ اللہ نے دو مشکل وقتوں میں اپنے دو خاص بندوں کے ذریعے اپنے دین کی حفاظت کی ۔ ایک رسول کائنات صلی اللہ علیہ وسلم کی وفات کے بعد جب مانعین زکوۃ اور مرتدین (اسلام سے پھر جانے والوں  ) کا فتنہ اٹھا تو حضرت ابو بکر رضی اللہ عنہ کی قوت ایمانی نے اس کا مردانہ وار مقابلہ کیا اور اللہ کی نصرت سے مالا مال ہوئے اوردوسرے جب قرآن کریم کے مخلوق ہونے کا شوشہ چھوڑ کر فتنہ اٹھایا گیا اور جب ایک دو کے علاوہ سارے علماء نے حکومت کی ہاں میں ہاں ملانے ہی میں اپنی عافیت سمجھی تو امام احمد بن حنبل رحمہ اللہ کے پہاڑ جیسے موقف نے اللہ کے دین کی حفاظت کی ۔ امام احمد بن حنبل ائمہ اربعہ میں سے ایک ہیں ۔ محدثین کے زمرے میں بھی ان کا شمار کبار ائمہ حدیث میں ہوتا ہے ۔ مسند احمد بن حنبل ان کی مشہور و معروف اور معتبر کتاب ہے ۔ 164 ہجری میں آپ کی پیدائش ہوئی اور 241 ہجری میں آپ کا انتقال ہوا ۔
امام احمد بن حنبل اپنی خدمت حدیث اور خدمت فقہہ کے لیے تو جانے جاتے ہی ہیں لیکن خاص طور سے آپ کو آپ کی پاکیزہ سیرت ، روشن کردار، زہد و ورع ، صبر وقناعت ، اتباع سنت رسول،  پہاڑ جیسے غیر متزلزل ایمان اور منہج صحابہ و تابعین پرقائم رہنے کے لیے جان کی بازی تک لگادینے کے فراواں جذبے کے لیے جانا جاتا ہے ۔ امام یحی بن معین فرماتے ہیں " میں نے احمد بن حنبل کے جیسا کسی کو نہیں دیکھا ۔ میں ان کے ساتھ پچاس سال تک رہا ۔ انہوں نے کبھی اپنی نیکی اور کامیابی کے لیے ہمارے سامنے فخر نہیں کیا " (حلیۃ الاولیاء 9/181 ) ربیع بن سلیمان کی روایت ہے کہ امام شافعی رحمہ اللہ فرماتے ہیں " احمد بن حنبل آٹھ خصلتوں میں امام ہیں ۔ حدیث میں امام ہیں ، فقہ میں امام ہیں ، لغت میں امام ہیں ، قرآن میں امام ہیں ، فقر میں امام ہیں ، زہد میں امام ہیں ، ورع میں امام ہیں اور سنت میں امام ہیں " ( مناقب الامام احمد ، مقدمۃ التحقیق ص 10 از عبداللہ بن عبدالمحسن الترکی ) عبدالرزاق بن ھمام کہتے ہیں " میں نے احمد بن حنبل سے زیادہ فقیہہ اور صاحب ورع شخص نہیں دیکھا " (ایضا ) عبدالملک المیمونی رحمہ اللہ فرماتے ہیں " میری آنکھوں نے احمد بن حنبل سے زیادہ بہتر کسی کو نہیں دیکھا۔ میں نے محدثین میں ان سے زیادہ اللہ کی حرمتوں کی تعظیم کرنے والا اور حدیثوں پر شدت سے عمل کرنے والا نہيں دیکھا جبکہ وہ حديث ان کے نزدیک صحیح ہو " ( ایضا ص 11 ) مروذی نے ان س روایت کیا ہے کہ " میں نے نبی صلی اللہ علیہ وسلم کی جب کوئی حدیث لکھی تو اس پر عمل کیا یہاں تک کہ میری نظروں سے گزرا کہ آپ صلی اللہ علیہ وسلم نے پچھنا لگوایا اور ابوطیبہ کو ایک دینار دیا تو میں نے جب پچھنا لگوایا تو حجام کو ایک دینار دیا " (ایضا 12 ) امام احمد بن حنبل کے بیٹے صالح بن احمد روایت کرتے ہیں کہ واثق کی طرف سے اسی کے عہد حکومت میں ایک پروانہ آیا جس کے اندر ہماری پریشان کن صورت حال کا ذکر تھا ۔ اور چارہزار درہم تھے اور گزارش کی گئی تھی کہ قرض ادا کرلیں ، اپنے اہل و عیال پر خرچ کریں اور یہ وضاحت بھی تھی کہ یہ صدقہ خیرات کا مال نہیں ہے بلکہ اپنے والد صاحب سے ملی وراثت کا حصہ ہے ۔ والد صاحب نے جواب میں لکھا " آپ کا خط ملا ، ہم عافیت میں ہیں ، قرض خواہ ہمیں تنگ نہیں کرتا اور اہل و عیال الحمد للہ اللہ کی نعمت میں جی رہے ہیں " اور یوں دراہم لوٹادیا ۔ ایک سال کے بعد جب ہم نے اس کا ذکر کیا تو کہا کہ اگر ہم نے قبول بھی کرلیا ہوتا تو اب تک وہ ختم ہی ہو چکا ہوتا ۔ (ایضا 16 )
    امام شافعی نے ان سے کہا : امیر المؤمنین نے مجھ سے کہا کہ ہے کہ میں یمن کے لیے کوئی قاضی تلاش کروں ۔اورآپ عبدالرزاق کے پاس جانا چاہتے ہیں ۔ یہ لیجیے آپ کو آپ کی مراد مل گئی ، حق کے ساتھ فیصلے کیجیے اور عبدالرزاق سے وہ سب سیکھیے جس کے آپ جویا ہیں ۔ امام احمد نے امام شافعی سے کہا " اگر دوبارہ یہ بات میں آپ سے سنوں گا تو آپ مجھے اپنے پاس نہیں دیکھینگے "
خشیت الہی کا وہ عالم تھا کہ ان کے بیٹے صالح کہتے ہیں کہ جب کوئی ابو کو دعا دیتا تو کہتے کہ اعمال کا دارو مدار خاتمے پر ہے ۔ (ایضا )
         یہ چند شہادتیں اس لیے پیش کی گئی ہیں کہ اندازہ ہو سکے کہ وہ آدمی جو تن تنہا دنیا کی سب سے بڑی حکومت سے ایمان و عقیدہ کے مسئلے پر ٹکر لے رہا تھا وہ داخلی طور پر کس قدر مضبوط کردار کا مالک تھا ۔ مصر کے بڑے عالم ابوزہرہ مصری نے اپنی کتاب "ابن حنبل حیاتہ وعصرہ ۔ آراءہ وفقہہ" میں  لکھا ہے کہ جب مامون کے اس مطالبے پر کہ قرآن کو مخلوق ماناجائے ، بعض علماء ومحدثین نے انکار سے کام لیا تو اس نے انہیں خط لکھا اور ایک ایک کو ان کی بعض کمیوں کی یاد دلائی اور کہا کہ ان کمیوں کو افشا کرکے انہیں رسوا کردے گا ، اپنے احسانات بھی یاد دلائے اور یوں انہيں خاموش کرنے میں کامیاب ہو گیا لیکن اس کے پاس امام احمد بن حنبل رحمہ اللہ کو مطعون کرنے کے لیے کوئی چیز نہیں تھی ۔ اس نے اور اس کے بعد معتصم نے انہيں زدو کوب تو کیا لیکن کوئی ان کے کردار و عمل پر حرف اٹھانے کی جرات نہ کرسکا ۔
        امام احمد بن حنبل کا اصل کردار صرف یہ نہيں کہ انہوں نے معتزلہ کے اس رویے کی مخالفت کی اور قرآن کو مخلوق ماننے سے انکار کردیا بلکہ اصل کارنامہ یہ ہے کہ انہوں نے طریقہ نبی اور قرآنی فکر کو باقی رکھنے پر اصرار کیا ۔ یہی وجہ ہے کہ وہ فلسفہ آمیزیوں میں پڑے ہی نہیں ، مناظرہ کیا ہی نہیں اور کہا تو یہ کہا کہ کتاب وسنت کی کوئی دلیل دے دو اور ہم تسلیم کیے لیتے ہیں ۔ احمد بن ابی دؤاد رئیس المعتزلین کو اس بات کا قلق تھا کہ احمد بن حنبل اس مسئلے پر بات کرنے کو تیار ہی نہیں ہوتے اور احمد بن حنبل کی فراست یہ تھی کہ قرآن وسنت کا کوئی نص لاؤ اور ہم قبول کرنے کے لیے تیار ہیں اور یوں انہوں نے سرے سے اس پورے طرز فکرو عمل کا راستہ ہی بند کردینا چاہا ۔ اور ہر چند کہ اس راہ میں انہيں جاں سوز مراحل سے گزرنا پڑا ، کوڑے کھانے پڑے ، بے عزتیاں سہنی پڑیں لیکن ٹس سے مس نہ ہوئے اور پھر وہ وقت آیا جب اللہ نے ایک احمد بن حنبل کے ذریعہ پورے دین کو محفوظ کردیا ۔ واثق کے زمانے میں جب محدثین اور اہل سنت و الجماعت کے علماء کی قدردانی ہونے لگی اور اس نے چاہا کہ امام احمد بن حنبل کو نوازے تو امام احمد بن حنبل نے اسے پہلی آزمائش سے زیادہ سخت سمجھا اور اس آزمائش میں بھی کھڑے اترے ۔
     امام احمد بن حنبل رحمہ اللہ کی فراست اور قوت ایمانی کا یہی مظہر نہیں بلکہ عظیم مظہر یہ بھی ہے کہ جب معتصم انہیں زدوکوب کررہا ہے اور ان کے اوپر عذاب کی سنتیں تازہ کی جارہی ہیں تب بھی وہ اسے امیر المؤمنیں کہہ کرہی خطاب کررہے ہیں ۔ اس پورے مرحلے میں لمحے بھر کو ان کے ذہن میں یہ نہیں آتا کہ وہ بغاوت کردیں یا عوام کو حکومت کے خلاف ورغلا دیں حالانکہ جس طرح پورے عالم اسلام میں ان کی پذیرائی تھی اور اس مسئلے میں جس طرح پوری مسلم دنیا ان کی طرف نگاہ اٹھائے ہوئی تھی کچھ اتنا بعید بھی نہ تھا کہ وہ اگر اشارہ کردیں تو عوام تختہ الٹنے کو تیار ہو جائیں لیکن وہ تھے بھی تو امام اہل السنۃ و الجما‏عۃ کیسے کرسکتے تھے ایسا غیر اسلامی عمل !
      آج کے اس پر فتن دور میں کئی ایک اعتبار سے اس سیرت کی مسلمانان عالم کو ضرورت ہے جسے سیرت امام احمد بن حنبل سے تعبیر کیا گیا ہے ۔ سنت رسول پر عمل کرنے کا جذبہ فراواں ، زہدو ورع ، علم و عمل ، صحابہ کرام کے نقش قدم کی پیروی اور ہر صورت میں اشتعال انگیزیوں سے دور رہنے کی بے نظیر مثال ۔ آج واقعۃ اس بات کی شدید ضرورت ہے کہ جب مختلف غلط سلط فلفسیانہ موشگافیوں کے ذریعہ اسلام کو بدنام کرنے کی کوشش ہورہی ہے کہ مسلمان نبوی طرز فکر و عمل پر اس طرح جم جائے جس طرح احمد بن حنبل جم گئے تھے ۔ آج مسلمان دور آشوب و فتن میں اسی طرح اشتعال انگیزیوں سے خود کو بچائے جس طرح امام احمد بن حنبل نےبچایا تھا ۔ آج مسلمان سنت رسول کو اسی شدت سے عمل میں لے لے جس طرح احمد بن حنبل کیا کرتے تھے ۔ آج مسلمان کا علماء طبقہ حب دنیا سے ایسے ہی کنارہ کش ہو جائے جس طرح احمد بن حنبل تھے ۔ آج ہمارے پاس علم و شعور کا ایسا ہی خزانہ ہو جیسا کہ امام احمد بن حنبل کے پاس تھا ۔ کتنی ضرورت ہے آج ہم میں احمد بن حنبل جیسے علماء کی کہ احمد بن ابراہیم الدورقی کہتے ہیں " جس کسی کو دیکھو کہ وہ احمد بن حنبل کا برا تذکرہ کرتا ہے اس کے اسلام پر اتہام لگاؤ " (تاریخ بغداد للخطیب : 4 /431 ) قتیبہ بن سعید کہتے ہیں " جب کسی شخص کو احمد بن حنبل سے محبت کرتے پاؤ تو جان لو کہ وہ صاحب سنت ہے " (ترجمۃ الامام احمد ، ص 16 ) اور علی بن المدینی شیخ البخاری کہتے ہیں " اللہ نے ارتداد کے دن ابوبکر کے ذریعہ  اور آزمائش کے دن احمد بن حنبل کے ذریعہ اس دین کو شوکت بخشی ( ایضا 17 )

    کیا ہم اس بات کے لیے خود کو تیار کررہے ہيں کہ اللہ ہمارے ذریعہ اس فتنے کے دور میں اپنے دین ( قرآن و سنت ) کی حفاظت کرلے ؟ کیا ہم احمد بن حنبل کا کردار ادا کرنے کو تیار ہيں ؟ ہے کوئ سننے والا ؟؟؟
غزل
ساگر تیمی
دعا کرو تو دواؤں میں ہو اثر پیدا
خدا جو چاہےغذاؤں میں ہو اثر پیدا
جناب شیخ ! یہی  سنت الہی ہے
عمل کرو تو صداؤں میں ہو اثر پیدا
عصا پڑا تو کئی راستہ بنا دریا
کلیمی ہو تو خلاؤں میں ہو اثر پیدا
غریب آج بھی محتاج آب ودانہ ہے
الہی !  اب تو ہواؤں میں ہو اثر پیدا
سنا تھا ان کی جفا ہی نشان الفت ہے
تمنا ہے کہ جفاؤں میں ہو اثرپیدا
کئی فقیر نے دی تھی دعا مسرت کی
دعا یہ ہے کہ گداؤں میں ہو اثر پیدا
کسی کی یاد میں رونے سے آنکھ  ساگر جی
دعا کرے گی بلاؤں میں ہو اثر پیدا